കേരള സർക്കാരിന്റെ പ്രവാസികളോടുള്ള കരുതൽ സ്വാഗതാർഹം : കേളി

റിയാദ് : കൊറോണ വ്യാപനത്തിനെതിരെ ഇന്ത്യൻ സർക്കാർ പ്രഖ്യാപിച്ച ലോക്ഡൗൺ മൂലം ദുരിതമനുഭവിക്കുന്ന പ്രവാസികളുടെ കരുതലിനായി മുഖ്യമന്ത്രി പിണറായി പ്രഖ്യാപിച്ച ധനസഹായം സ്വാഗതാർഹവും ഒട്ടനവധി പ്രവാസികൾക്ക് ആശ്വാസപ്രദവുമാണെന്ന് കേളി കലാസാംസ്കാരിക വേദി.

പ്രവാസി ക്ഷേമനിധി ബോർഡിൽ അംഗങ്ങളായ എല്ലാ പെൻഷൻകാർക്കും പെൻഷൻ തുകയ്ക്ക് പുറമേ ഒറ്റത്തവണ ധനസഹായമായി ആയിരം രൂപയും (15000 പേർക്ക് ഇതിന്റെ ആനുകൂല്യം ലഭിക്കും) ക്ഷേമനിധിയിൽ അംഗങ്ങളായിട്ടുള്ള കോവിഡ് പോസിറ്റീവായ പ്രവാസികൾക്ക് 10,000 രൂപയും ധനസഹായം ലഭിക്കും. ഈ രണ്ട് ധനസഹായങ്ങളും പ്രവാസി ക്ഷേമനിധി ബോഡിന്റെ ഫണ്ടിൽ നിന്നായിരിക്കും അനുവദിക്കുക

കോവിഡ് 19നെ സാന്ത്വന ചികിത്സാ രോഗങ്ങളുടെ പട്ടികയിൽ ഉൾപ്പെടുത്തുകയും ഇതിലൂടെ ക്ഷേമനിധിയിൽ അംഗങ്ങളല്ലാത്ത കോവിഡ് പോസിറ്റീവായ പ്രവാസികൾക്കും 10,000 രൂപ സഹായം ലഭിക്കും. 2020 ജനുവരി ഒന്നിന് ശേഷം വാലിഡായ പാസ്പോർട്ട്, തൊഴിൽ വിസ എന്നിവയുമായി വിദേശരാജ്യങ്ങളിൽ നിന്ന് നാട്ടിലെത്തി തിരിച്ചുപോകാൻ സാധിക്കാത്തവർക്കും ലോക്ക്ഡൗൺ കാലയളവിൽ വിസ കാലാവധി തീർന്നവർക്കും 5000 രൂപ അടിയന്തര സഹായം നോർക്ക നൽകും. കോവിഡ് മഹാമാരിയിൽ ലോകമെങ്ങും സ്തംഭിച്ചിരിക്കുമ്പോൾ കേരളത്തിലെ ഇടതുപക്ഷ സർക്കാർ അതിനെ പ്രതിരോധിക്കാൻ എടുക്കുന്ന നടപടികളും ലോക്ഡൗൺ മൂലം ദുരിതമനുഭവിക്കുന്നവർക്ക് ആശ്വാസമേകാൻ പ്രഖ്യാപിച്ച നിരവധി പദ്ധതികളും കേരളമോഡൽ എന്നപേരിൽ ലോകശ്രദ്ധ ആകർഷിച്ചതോടൊപ്പം ഇന്ത്യ മുഴുവൻ അത് വ്യാപിപ്പിക്കാൻ കേന്ദ്ര സർക്കാർ മറ്റു സംസ്ഥാനങ്ങളോട് നിർദ്ദേശിച്ചിരിക്കുന്നതും കേരളീയർക്ക് മൊത്തം അഭിമാനാർഹവുമാണെന്ന് കേളി സൂചിപ്പിച്ചു.
മഹാമാരിയിൽപെട്ട് ഗൾഫ് രാജ്യങ്ങളിൽ ദുരിതമനുഭവിക്കുന്ന മലയാളികളെ കേരളത്തിൽ തിരിച്ചെത്തിക്കാനുള്ള കേരളസർക്കാറിന്റെ പരിശ്രമങ്ങൾക്ക് എല്ലാവിധ പിന്തുണയും നൽകുമെന്നും കേളിസെക്രട്ടറിയറ്റ് ഇറക്കിയ പ്രസ്താവനയിൽ പറഞ്ഞു

Spread the word. Share this post!

About the Author

റിയാദിലും പരിസര പ്രദേശങ്ങളിലും പ്രവര്‍ത്തികുന്ന , ബത്ത ആസ്ഥാനമായുള്ള പ്രവാസി സംഘടനയാണ് കേളി . കക്ഷി രാഷ്ട്രീയ, ജാതി മത ഭേദമന്യേ സാമൂഹിക നന്മ മുന്‍നിര്‍ത്തിയുള്ള ജീവകാരുണ്യ പ്രവര്‍ത്തനങ്ങളും , സാംസ്കാരിക കലാകായിക പ്രവര്‍ത്തനങ്ങളുമാണ് സംഘടനയുടെ മുഖ്യ ലക്ഷ്യങ്ങള്‍ . ഗള്‍ഫ് മലയാളികളുടെ പ്രശ്നങ്ങളില്‍ സൌദി അറേബ്യയിലെ നിയമങ്ങള്‍ക്ക് വിധേയമായി ഇടപെടുക, കേന്ദ്ര കേരള സര്‍ക്കാരുകളില്‍ നിന്നും പ്രവാസികള്‍ക്ക് ലഭിക്കുന്ന ആനുകൂല്യങ്ങളെക്കുറിച്ച് അംഗങ്ങളെ ബോധവാന്‍മാരാക്കുകയും , തങ്ങളെ ബാധിക്കുന്ന തരത്തിലുള്ള തെറ്റായ നയങ്ങളില്‍ പ്രതിഷേധിക്കുകയും ചെയ്യുക തുടങ്ങി കേളിയുടെ പ്രവര്‍ത്തനങ്ങള്‍ റിയാദിലെ പ്രവാസി സമൂഹത്തില്‍ ആഴത്തില്‍ വേരുറപ്പിച്ചു കിടക്കുന്നു .