റിയാദ്: മരണത്തിലും മാനവികതയുടെയും ശാസ്ത്രബോധത്തിന്റെയും ഉദാത്ത മാതൃകയായി സഫ്‌ദർ ഹാഷ്മി. തന്റെ ചേതനയറ്റ ശരീരം മെഡിക്കൽ വിദ്യാർത്ഥികളുടെ പഠനത്തിനായി വിട്ടുനൽകണമെന്ന 21-ാം വയസ്സിലെ സഫ്‌ദറിന്റെ തീരുമാനം സമൂഹത്തിന് വലിയൊരു സന്ദേശമാണ് നൽകുന്നത്. മുൻ കേളി അംഗവും കേളി സെന്റർ യൂണിറ്റ് മുൻ ട്രഷററുമായ സഖാവ് അബ്ദുൽ മജീദിന്റെയും ഷെഫീനയുടെയും മകനാണ് സഫ്‌ദർ ഹാഷ്മി.
എല്ലുകളെ ബാധിക്കുന്ന ഓസ്റ്റിയോസാർക്കോമ (Osteosarcoma) എന്ന അർബുദത്തെ തുടർന്ന് കഴിഞ്ഞ ഏതാനും വർഷങ്ങളായി തിരുവനന്തപുരം റീജിയണൽ കാൻസർ സെന്റർ (ആർ.സി.സി.) ഉൾപ്പെടെയുള്ള ആശുപത്രികളിൽ സഫ്‌ദർ ചികിത്സയിലായിരുന്നു. ചികിത്സയുടെ അവസാന ഘട്ടത്തിൽ ഇടമുട്ടം പാലിയേറ്റീവ് കെയറിലാണ് മൂന്നര മാസത്തോളം കഴിഞ്ഞത്.
ദീർഘകാലം ചികിത്സയ്ക്കായി കഴിഞ്ഞ തിരുവനന്തപുരം ആർ.സി.സി.യിൽ തന്റെ ശരീരം ദാനം ചെയ്യാനായിരുന്നു സഫ്‌ദറിന്റെ ആഗ്രഹം. എന്നാൽ തൃപ്രയാറിൽനിന്ന് തിരുവനന്തപുരത്തേക്കുള്ള ദൂരം പ്രായോഗിക തടസ്സമായതിനെ തുടർന്ന് മൃതദേഹം തൃശൂർ മെഡിക്കൽ കോളേജിലേക്ക് കൊണ്ടുപോയി.
മകന്റെ മരണത്തിൽ കുടുംബം കടുത്ത ദുഃഖത്തിലാണെങ്കിലും, അവന്റെ പക്വമായ തീരുമാനത്തിലും വായനയിലൂടെയും അറിവിലൂടെയും വളർത്തിയെടുത്ത കാഴ്ചപ്പാടുകളിലും പിതാവ് മജീദിന് അഭിമാനമുണ്ട്. രോഗത്തെ അതിജീവിച്ച് മകൻ ജീവിതത്തിലേക്ക് തിരിച്ചുവരുമെന്ന പ്രതീക്ഷയിലായിരുന്നു പിതാവ്. ആ പ്രതീക്ഷകൾ തകർന്നതിന്റെ വേദനയ്ക്കിടയിലും മകന്റെ മഹത്തായ തീരുമാനത്തെ ഓർക്കുമ്പോൾ അദ്ദേഹത്തിന്റെ വാക്കുകളിൽ അഭിമാനവും ദുഃഖവും ഒരുപോലെ നിറയുന്നു.
സ്വന്തം ശരീരം വൈദ്യശാസ്ത്ര പഠനത്തിനായി സമർപ്പിക്കാനുള്ള സഫ്‌ദറിന്റെ തീരുമാനം ശാസ്ത്രബോധത്തിന്റെയും സാമൂഹിക ഉത്തരവാദിത്വത്തിന്റെയും പുരോഗമന ചിന്തയുടെയും മികച്ച ഉദാഹരണമാണ്. മകന്റെ ആഗ്രഹം നടപ്പിലാക്കാൻ പിന്തുണ നൽകിയ മാതാപിതാക്കളുടെ നിലപാടും സമൂഹത്തിന് മാതൃകയാണ്.
സഫ്‌ദർ ഹാഷ്മിയുടെ വിയോഗത്തിൽ കേളി കലാസാംസ്കാരിക വേദി അനുശോചനം രേഖപ്പെടുത്തി. സഖാവ് അബ്ദുൽ മജീദിനും ഷെഫീനയ്ക്കും കുടുംബത്തിനും ഈ തീരാനഷ്ടം താങ്ങാനുള്ള കരുത്ത് ലഭിക്കട്ടെയെന്നും ആഗ്രഹിക്കുന്നു.
